Grenchen

Öbbe am 10i heimer üs aui z Grenche bir Badi troffe. Vo dört us si de d Fraue (Oli, Michèle, Nadja und Chrigi) im Nadja ihrem Auto und mir Herre (Christian, Michel, Mättu, Yanick und der Römu) mitem Christian sim Auto uf Olte gfahre. Ufem Wäg hets de leider scho afo regne und d'Stimmig isch nid grad super gsi. Womer z Olte ir Badi acho si heimer üs dank dem, dass der Michel 2 grossi Blachene mitgno het, es Dach chönne boue zwüsche 3 Böim. Der Christian isch Zitnämer gsi und der Nicolas isch de no vor Wettkampfbeginn zu üs gstosse. Langsam so geg die 12i ischs de scho as Ischwümme gange. S'Wasser isch nidemou so chaut gsi, im Gegesatz zum Wetter.

Us ersts isch d'Flossestaffle dracho. Dört si d'Herre und d'Fraue beidi nid schlecht gsi. Nachder Disziplin simer üs aui go abtröchne und hei e Jagge oder e Parka agleit bis zur nöchste Disziplin. Das isch jewils aber nid so lang gange.

Us nöchschts ischs Bäbischwümme dragsi und au dört si d Herre zimlech guet gsi im Verglich zum Grenchner Wettkampf und bi de Dame s'gliche. De isch nur no d'Gurtretterstaffle cho vorder grosse 2-stündige Pause. D'Herre si wider mit recht guete Zite gschwumme und d'Fraue glaub au.

Wie gseit heimer necher 2 Stung Pause gha, aber wöusi früe dra si gsi heimer sogar 2.5 Stung Pause gha. I dere Zit hetme müese go Bäuele, wenn me ufgrüeft worde isch und me het as Jubiläumsapéro chönne go. Dört simer üs de chli go verpflege und necher heimer öbber gfrogt gha, obmer mit ihrne Bäu ech chli chönnte üebe ufem Rase. (D Oli het das super chönne ;P). Bim bäuele hei de d Herre konstant 2 Zwöier gschosse, usserem Michel, wo nur e Einer und e Nuller gmacht het :D. D'Dame si mit 13 Pünkt genau glich guet gsi wie mir.

Nachem Bäuele heimer immer no vüu Zit gha und drum heisech de es paar entschide, uf d'Rutschbahne z'go. Bi der steile ir Mitti het d'Michèle irgendwie immer der Gring agschlage und der Michel isch immer grad bis i d'Wang ine gleitet :D. Der Mättu und d'Chrigä hei de au no es Rönne gmacht uf der lengere Rutschbahn (d'Chrige uf de Chnöi und der Mättu liggend).

Nach em ne Wili het der Michel üs de überzügt gha, no id Aare z go. der Mättu, Michel und ig hei wöue ab der Brügg gumpe, aber wöumer nid gwüsst hei, ob öbbis ungedra im Wasser isch, heimers de nid gmacht. Mir si de aui vo so chliine Bootli am Rand drigumped und weg der starche Strömig blitzschnell wider bir Badi unge gsi. Bevor mer de wider hei müese go schwümme heimer üs nomou aui gstercht und ufgwermt.

Die nöchsti Disziplin isch e chli ne abnormali gsi: D'Nostalgiestaffle. Dört het der Erst müese 50 m Crawl schwümme, der 2. mitere Taucherbrüue undemne Schnorchu müese tauche und es Ringli vor Mitti vom Bassin mitnä. Der Yanick, wo das het müese mache, het's schwarze Ringli leider nid gse, wöus der Mättu ufe schwarz Strich am Bode gleit het gha, und er het de nomou müese umchere :D. Der 3. het müese mitemne schwere Tauchring ufem Buch ufem Rügge schwümme und der letscht het müese Chleiderschwümme. Das binig gsi (Römu) mit Regehose und emne Puli :P. Es het sech de usegstöut, dass d'Regehose glich nid die besti Wahl gsi si. D'Oli het ihri Hose unge mitemne Gumeli zemegmacht :D.